30 Jahre Jodelduett Geschwister Rohrer

Gedicht von Hans von Rotz

 

Äs isch soo scheen, dass iär hit hiä tiänd singä, und iichi tollä Stimmä lahnd la klingä.

Miär hend a iich doch grossi Freid, ds singä und ds juitzä hends iich zweinä id Wiägä gleid.

 

1988 hend iär bim Stadelma Franz ä Jodlerkurs bsuächt,

und scho glii derna hends iär ohni Understitzig vom Fachma sälber versuächt.

 

1990 a der Sachslerstubetä, der erscht Uiftritt, isch scho cheibä guäd glungä,

vorhär hend iär nur midem Vater a Familifäscht gsungä.

 

Scho 33 Jahr sind iär etz im Verband,

und reisid sitdem chriiz und quer ufem Globus umänand. (China, Amerika, Öschtriich, Diitschland, Holland, Italiä, Frankriich)

 

Iichers erschtä Jodlerfäscht isch ai sehr guäd glungä,

da hend iär grad d Notä 1 uisägsungä.

 

1997 ds Sempach, da hed doch d Andrea ä Riesäfreid,

da hesch nämlich grad der Siegerpriis heitreid.

 

1998, am Folklorewettbewärb ds Innsbruck hend iär im Duett gsungä,

und midem Bärghuisjuiz vo der Andrea d Heechschtuiszeichnig errungä.

 

1999 am Radio Wettbewärb, mach Schwiizerferie, da henders ai wider super preicht,

und hend midemä Jodelliäd dr dritti Rang erreicht.

 

1999 – 2020 hend iär bim Jodlerklub Fruttkläng Chärns iichi scheenä Stimmä la klingä,

und  a jedem Jodlerfäscht, i derä Ziit derfä d Notä 1 heibringä.

 

2013 Roni der Alpensohn, das Singspiel im Melchtal, das wird nu lang i Erinnerig bliibä,

iär hend iich sogar uifglah, ds ganzä Drähbuäch ds schriibä.

 

Mid Freid und viel Härzbluäd hend iär zwenzg Jahr mid iis Chärnser Jodler verbrungä,

und ds hundertä scheeni Juiz und Liäder gsungä.

 

Iär hend nid nur gsungä, und Petra als Vice dirigiärd,

i denä Zwenzg Jahrä hend iär ai nu einigi Juiz und Liäder komponiärd.

 

Iär liäbid dr natiirlichi und pflägti Jodelgsang,

und sälbverschtändlich ä uisglichnä und harmonischä Chorklang.

 

Freid und Humor, das isch iich immer wichtig,

nur soo läbt Kameradschaft äso richtig.

 

Ai im Radio und Färnseh hend iär derfä singä,

und villnä Liit ä chlii Freid und Sunnäschiin i d Stubä inäbringä.

 

Jedä Uiftrid macht iich grossi Freid,

das hend sii miär denu ägschtra gseid.

 

Midem Wisel Gyr hend iär ä Jodlerturnee, quer dur d Schwiiz derfä machä,

ai da heig äs mengs gä, zum schmunzlä und lachä.

 

Ämenä Schuälprojekt mid 1200 Chind hend iär mid denä derfä singä,

und so a dä Jungä ds singä und ds juizä chennä chli neecher bringä.

 

Mid dr Produktion vo zwei Chindersingbiächer hends mid Freid und Härzbluäd ai verstandä,

wiämä ai bi dä Chliinschtä als Vorbild cha landä.

 

Ds Gedicht, äs Gschänk vom Himmel, vom Robi Kuschter, hed iich ganz bsunders gfreid,

will das Gedicht uber d Gaab vom singä und iichnä wunderscheenä Stimmä, so ziemlich alles uisseid.

 

Viär Tonträger im Duett und em Widi Marie als Dichtri (Grosstante) und zwee Tonträger midem Jodlerklub Fruttkläng, hend iär i denä zwenzg Jahrä produziärd,

so, das ai nach iicher Aktivziit nu ä scheeni Erinnerig äxistiärd.

 

Skifahrä, wandrä, E-Bike fahrä und Aquajogging, ds ganz Jahr i der Natuir tuäd eifach zu iich gheerä,

ä scheenä Uisgliich zum singä, aber das tuäd iich ai niämer verwehrä.

 

Und so hoffid miär, dass miär iich nu mengs Jahr chenid zuälosä bim singä,

und iichi hellä, scheenä Stimmä nu lang lang derfid im Härz und i dä Ohrä la klingä.